Адкрыццё новага бізнес-курса Акадэміі экспарту БелГПП

У Беларускай гандлёва-прамысловай палаце адбылося адкрыццё новага бізнес-курса ў рамках праекта «Акадэмія экспарту». Новая праграма «Новыя ўмовы – новыя магчымасці» распрацавана БелГПП з мэтай аказання кіраўнікам і спецыялістам прадпрыемстваў і арганізацый-экспарцёраў комплекснай падтрымкі на ўсіх этапах экспартнага цыкла.

У адкрыцці бізнес-курса прынялі ўдзел намеснік старшыні БелГПП Дзяніс Мялешкін, намеснік дырэктара Дэпартамента – начальнік упраўлення каардынацыі знешнеэканамічнай дзейнасці Дэпартамента знешнеэканамічнай дзейнасці Міністэрства замежных спраў Рэспублікі Беларусь Яраслаў Міцкевіч, дырэктар Цэнтра дзелавой адукацыі БелГПП Алена Харашэўская, лектары і слухачы Акадэміі экспарту.

Намеснік старшыні БелГПП адзначыў, што сёлета Акадэміі экспарту ўжо 5 гадоў. За гэты час навучанне прайшлі больш за 3 тысячы слухачоў. «Новы бізнес-курс «Акадэміі экспарту» – гэта не толькі прадаўжэнне навучання па актуальных для экспарту напрамках, але і абноўлены спіс тэм, які адпавядае часу», – падкрэсліў Дзяніс Мялешкін.

У аснове праграмы – 12 тэматычных модулей з абноўленым зместам па асноўных напрамках вядзення экспартнай дзейнасці на сучасным этапе: «Экспартныя стратэгіі і маркетынгавыя даследаванні», «Ацэнка патэнцыялу экспартнага рынку», «Упраўленне продажамі», «Тэхніка публічных выступленняў», «Новыя падыходы ў арганізацыі і правядзенні выставак», «Мытнае суправаджэнне экспартнага праекта», «Экспартны кантракт», «Кіраўніцкі ўлік: кіраванне выдаткамі», «Транспартная лагістыка і грузаперавозкі», «Падаткі ў экспартнай дзейнасці», «Дзелавы этыкет і пратакол», «Еўразійскі эканамічны саюз».

«Модулі пабудаваны такім чынам, каб навучыць прадстаўнікоў прадпрыемстваў выбудоўванню экспартных стратэгій. У модулі «Экспартны кантракт» будуць разгледжаны пытанні, звязаныя з санкцыямі, прынятымі супраць Беларусі. А заняткі па модулі «Еўразійскі эканамічны саюз» будуць праводзіцца сумесна са спікерамі з Еўразійскай эканамічнай камісіі, якія раскажуць аб узаемадзеянні і магчымасцях па лініі ЕЭК. У якасці лектараў запрошаны вядомыя бізнес-трэнеры, выкладчыкі профільных дысцыплін вядучых ВНУ, эксперты з багатым практычным вопытам у сферы знешнеэканамічнай дзейнасці», – распавёў намеснік старшыні БелГПП.

Дырэктар Цэнтра дзелавой адукацыі БелГПП Алена Харашэўская адзначыла, што з кожным годам колькасць удзельнікаў бізнес-курса павялічваецца, і сёлета слухачамі стануць прадстаўнікі больш за 200 прадпрыемстваў. Яны атрымаюць актуальныя веды і змогуць іх прымяніць на практыцы, дзякуючы чаму прадпрыемствы змогуць развівацца і выходзіць на новыя рынкі.

«У гэтым годзе быў створаны модуль «Упраўленне продажамі», у якім зроблены акцэнт на развіцці дыстрыбуцыі. Пасля заканчэння модуля па ацэнцы патэнцыялу рынку слухач будзе разумець, як шукаць новых партнёраў, ацэньваць беларускі рынак і выходзіць на новыя ступені супрацоўніцтва. Апроч гэтага ў курсе ёсць асобныя заняткі па санкцыйным рэгуляванні. Мы раскажам пра нюансы і тонкасці, якія прадпрыемствы павінны ўлічваць пры заключэнні дагавораў са сваімі контрагентамі, каб пазбегнуць невыканання абавязацельстваў», – патлумачыла Алена Харашэўская.

Яна таксама падкрэсліла, што ў асобны модуль была вынесена выставачная дзейнасць, каб прадстаўнікі прадпрыемстваў разумелі, які ўклад удзел у міжнародных выставах уносіць у папулярызацыю беларускай прадукцыі.

«У модулі «Дзелавы этыкет і пратакол» будзе зроблены акцэнт на краінах далёкай дугі, таму што перад беларускімі прадпрыемствамі стаіць задача па выхаду на рынкі гэтых дзяржаў», – адзначыла дырэктар Цэнтра дзелавой адукацыі БелГПП.