Беларусь і Шаньдун: новыя вехі прамыслова-тэхналагічнага партнёрства

Беларуская гандлёва-прамысловая палата сумесна з Кітайска-Беларускім індустрыяльным паркам «Вялікі камень» арганізавала кантактна-кааперацыйную біржу для беларускіх прадпрыемстваў і дзелавой дэлегацыі правінцыі Шаньдун (КНР).

Прадстаўнікі 18 высокатэхналагічных кітайскіх кампаній і звыш 60 беларускіх арганізацый прамысловай, аграхарчовай, фінансавай, транспартна-лагістычнай, адукацыйнай і камунальнай сфер наладзілі кантакты і правялі прадуктыўныя перагаворы на пляцоўцы індустрыяльнага парка «Вялікі камень».

Адкрываючы сустрэчу, намеснік старшыні БелГПП Алена Маліноўская нагадала аб даўніх і трывалых сувязях паміж Беларуссю і правінцыяй Шаньдун у рамках як розных эканамічных праектаў, так і рэгіянальных пабрацімскіх адносін.

– Прыемна, што сёння менавіта з гэтым добра вядомым у нас рэгіёнам, які з'яўляецца да таго ж адным з драйвераў усёй кітайскай эканомікі, мы закладваем чарговую «цаглінку» ў фундамент беларуска-кітайскага ўсебаковага і ўсепагоднага стратэгічнага партнёрства, – падкрэсліла Алена Маліноўская.

Паводле яе слоў, Беларусь стала сапраўдным «пунктам прыцягнення» для шматлікіх кітайскіх бізнес-дэлегацый, а кіраўнікі БелГПП і дыпмісіі КНР у Мінску нядаўна пацвердзілі добрыя перспектывы для дзелавога супрацоўніцтва дзвюх краін.

Кіраўнік кітайскай дэлегацыі, начальнік аддзела прамысловага інтэрнета дэпартамента прамысловасці і інфарматызацыі правінцыі Шаньдун Вэй Вэй адзначыў, што гэты рэгіён вельмі зацікаўлены ў сумесных з Беларуссю даследаваннях і супрацоўніцтве з нашай краінай у галіне перадавых прамысловых распрацовак.

– Беларусь з'яўляецца не толькі важным транспартным вузлом у еўразійскім рэгіёне, але і валодае трывалай прамысловай базай, выдатнымі навуковымі і тэхналагічнымі талентамі, – акцэнтаваў прадстаўнік шаньдунскіх улад.