Анлайн-сустрэча сустаршыняў Беларуска-Турэцкага савета дзелавога супрацоўніцтва

Адбылася рабочая сустрэча ў рэжыме анлайн сустаршыняў Беларуска-Турэцкага савета дзелавога супрацоўніцтва Паўла Марыненкі (кіраўнік адміністрацыі СЭЗ «Магілёў», з беларускага боку) і Йылмаза Сойджана (старшыня савета дырэктараў групы кампаній Soycan, з турэцкага боку). У сустрэчы прынялі ўдзел прадстаўнікі Пасольства Беларусі ў Турцыі.

Вітаючы гасцей, старшыня БелГПП Міхаіл Мятлікаў выказаў надзею, што Савет дзелавога супрацоўніцтва Беларусі і Турцыі ў новым яго фармаце стане яшчэ больш эфектыўнай пляцоўкай для ўстанаўлення кантактаў і развіцця канструктыўнага супрацоўніцтва беларускіх і турэцкіх прадпрыемстваў і арганізацый, адкрые новыя напрамкі і магчымасці для ўзаемавыгаднага партнёрства бізнесу.

У ходзе рабочай сустрэчы прадметна разгледжаны актуальныя пытанні двухбаковага гандлёва-эканамічнага ўзаемадзеяння, абмеркаваны ідэі і планы работы па лініі дзелавых саветаў, некаторыя праблемныя пытанні бізнесу і магчымыя шляхі іх вырашэння, а таксама перспектывы арганізацыі абмену візітамі і правядзення сумесных дзелавых мерапрыемстваў.

Па выніках сустрэчы прынята рашэнне аб правядзенні пасяджэння Беларуска-Турэцкага савета дзелавога супрацоўніцтва ў лістападзе бягучага года ў рамках візіту ў Стамбул дэлегацыі беларускага бізнесу.