Сустрэча намесніка старшыні БелГПП Д.Мялешкіна з намеснікам Міністра міжнародных адносін і супрацоўніцтва ПАР Э.Батэсам

У Беларускай гандлёва-прамысловай палаце адбылася сустрэча намесніка старшыні БелГПП Дзяніса Мялешкіна з намеснікам Міністра міжнародных адносін і супрацоўніцтва Паўднёва-Афрыканскай Рэспублікі Элвінам Батэсам. У сустрэчы прыняў удзел Надзвычайны і Паўнамоцны Пасол ПАР у Расійскай Федэрацыі і Рэспубліцы Беларусь па сумяшчальніцтве Мзувукіле Джэф Макетука.

У ходзе сустрэчы разгледжаны перспектыўныя напрамкі гандлёва-эканамічнага супрацоўніцтва беларускіх кампаній з Паўднёва-Афрыканскай Рэспублікай, пытанні ўзаемадзеяння БелГПП з партнёрскімі арганізацыямі ў ПАР для садзейнічання бізнесу дзвюх краін у развіцці дыялога, перспектывы арганізацыі абмену дэлегацыямі і правядзення дзелавых мерапрыемстваў.

Намеснік міністра міжнародных адносін і супрацоўніцтва ПАР адзначыў, што дэлегацыя, якую ён узначальвае, падчас візіту ў Беларусь наведала шэраг прадпрыемстваў і арганізацый, азнаёмілася з вытворчым, лагістычным патэнцыялам краіны. Паводле яго слоў, бачацца перспектыўнымі сумесныя праекты па зборцы тэхнікі і абсталявання, выкарыстанні навукова-тэхнічных распрацовак беларускіх вучоных для развіцця праектаў у галіне аднаўляльнай энергетыкі, а таксама супрацоўніцтва ў сферах лагістыкі, інфармацыйных тэхналогій і тэлекамунікацый, здабычы і перапрацоўкі карысных выкапняў і газу.